कुरीअर पार्सलमध्ये ड्रग्ज आढळल्याचे सांगून फसवणार्‍या राजस्थानच्या टोळीचा पर्दाफाश

आरोपींनी गुन्ह्यासाठी वापरलेल्या बँक खात्यांपैकी एक खाते हे नाशिक येथील रिक्षा चालविणार्‍याचे असल्याचे पोलिसांना समजले.  त्यानुसार, नाशिक येथे पथक पाठवून तपास केला असता एका काळ्या रंगाच्या मोटारीतून एक जण येवून त्या व्यक्तीच्या खात्याची माहिती घेत बँक पासबुक, धनादेश बुक घेवून जात असल्याची माहिती मिळाली. त्यावरुन सखोल तपास केला असता जोधपूर, राजस्थान येथील काही जण पिसोळी, उंड्री भागात राहत असल्याबाबत तसेच त्यांच्याकडे काळ्या रंगाची मोटार असल्याची माहीती मिळाली. त्यानुसार, पथकाने पिसोळी येथील जगदंबा भवनजवळील एआरव्ही न्यु टाऊन सोसायटीतील एका सदनिकेत छापा टाकला. आरोपींकडून वेगवेगळ्या कंपनीचे १८ मोबाईल, ९० मोबाईल सिमकार्ड, एक लॅपटॉप, ६० बँक पासबुक किट, ६० एटीएम, डेबिट कार्ड, दोन पारपत्र, १५ आधार कार्ड, तीन पॅन कार्ड, तीन वाहन परवाना, १७०० रुपयांची रोकड व दोन मोटारी असा ७२ लाख १७ हजार रुपयांचा मुद्देमाल जप्त करण्यात आला.

आरोपी हे फसवणुकीच्या रकमेतून युएसडीटी मार्फत देशांतर्गत व परदेशात पैसे पाठवित असल्याची माहिती मिळाली आहे. त्यानुसार, अधिक तपास करणे, त्यांनी गुन्हा करण्यासाठी वापरलेले बँक खाते, त्यामधील व्यवहार, इतर साथीदारांकडे मिळून आलेला मुद्देमाल तसेच त्यांचा अशा प्रकारे किती गुन्ह्यात सहभाग आहे, याबाबतचा तपास पोलिसांकडून सुरु आहे.