पालघर : पालघर जिल्हा परिषदेच्या ५७ जागांसाठी तसेच आठ पंचायत समितीच्या ११४ सदस्यांच्या आगामी काळात होणाऱ्या निवडणुकीसाठी जिल्ह्यातील १२.२३ लक्ष मतदार पात्र ठरले आहेत. १ जुलै रोजीच्या मतदार यादीची वैधता स्थानिक स्वराज्य संस्थांच्या निवडणुकीसाठी ग्राह्य धरण्यात येणार असून जिल्ह्यातील लोकसभा क्षेत्रातील मतदार संख्येच्या ५१ टक्के मतदान जिल्हा परिषद, पंचायत समिती निवडणुकीसाठी पात्र ठेवल्याचे दिसून आले आहे. सन २०२४ च्या विधानसभा निवडणुकीसाठी पालघर जिल्ह्यातून २२.९२ लक्ष मतदार पात्र ठरले होते. तर १ जुलै २०२५ रोजी जिल्ह्यातील मतदार संख्या २३.९० लक्ष इतकी होती. दरम्यानच्या कालावधीत जिल्ह्यामध्ये ९७६९९ मतदार संख्या वाढली असून त्यापैकी वसई विधानसभा क्षेत्रात ४५ हजार, बोईसर विधानसभा क्षेत्रात २५ हजार मतदारांचा समावेश आहे. उर्वरित चार विधानसभा मतदारसंघात (वसई, डहाणू, पालघर, विक्रमगड) दरम्यानच्या नऊ महिन्यांच्या कालावधीत साडेपाच ते साडेआठ हजार मतदार वाढल्याचे दिसून आले आहे.
जिल्हा परिषदेच्या ५७ गटांसाठी होणाऱ्या निवडणुकीसाठी १२ लक्ष २२ हजार ९७९ मतदार पात्र ठरले असून पालघर तालुक्यातील १७ जागांसाठी तीन लक्ष ६३ हजार मतदार पात्र ठरले आहेत. डहाणू तालुक्यातून १३ जिल्हा परिषद गटांसाठी निवडणूक होणार असून तालुक्यातील २.९० लक्ष मतदार पात्र ठरले आहेत. उर्वरित तालुक्यांमध्ये तीन ते सहा सदस्यांची निवडणूक होणार असून या तालुक्यांमध्ये ५५ हजार ते ९६ मतदार पात्र ठरले आहेत. लोकसभा क्षेत्रातील मतदार संख्येचा विचार केल्यास जिल्ह्यातील सुमारे ११.६७ लक्ष मतदार (४९ टक्के) मतदार जिल्ह्याच्या शहरी भागात वास्तव्य करत असल्याचे मतदार संख्येच्या आकडेवारीवरून दिसून आले आहे. जिल्हा परिषद पंचायत समितीच्या सार्वत्रिक निवडणुकीसाठी जिल्ह्यात १५०१ मतदान केंद्र निश्चित करण्यात आले असून पालघर तालुक्यात सर्वाधिक ४१५ मतदान केंद्र आहेत. डहाणू तालुक्यात ३७०, वाडा तालुक्यात १६६, विक्रमगड तालुक्यात १३१, जव्हार तालुक्यात १२७, तलासरी तालुक्यात १२१, वसई तालुक्यात १०२ तर मोखाडा तालुक्यात ६९ मतदान केंद्र निश्चित करण्यात आले आहेत.
