मुंबई : कोकणी माणूस मुंबईत असो किंवा अन्य कुठेही कामाला असला, तरी त्याचे गणपतीच्या सणाला गावी कोकणात जाण्याचे नियोजन वर्षभरापूर्वीच ठरलेले असते. यंदाचा गणेशोत्सव 7 सप्टेंबरला असून त्यासाठी चाकरमान्यांना दोन दिवस आधीच कोकणात जाण्यासाठी घाई करत असतात. याचपार्श्वभूमीवर कोकणातील गणेश भक्तांसाठी पश्चिम रेल्वेने कोकण रेल्वे मार्गावर आणखी विशेष गाड्या सोडण्याची योजना आखली आहे. उन्हाळी आणि पावसाळ्यातील विशेष गाड्यांनंतर आता पश्चिम रेल्वेने गणपती महोत्सवासाठी विशेष गाड्या चालवण्याची घोषणा केली आहे. गणपती सणानिमित्त जादा गर्दीवर नियंत्रण ठेवण्याच्या उद्देशाने पश्चिम रेल्वे मुंबई सेंट्रल-ठोकूर, मुंबई सेंट्रल-सावंतवाडी रोड, वांद्रे टर्मिनस-कुडाळ, अहमदाबाद-कुडाळ, विश्वामित्री-कुडाळ आणि अहमदाबाद-मंगळुरु स्थानकांदरम्यान विशेष भाड्यावर विशेष गाड्या चालवणार आहे.
काही दिवसांपूर्वी जाहीर केलेल्या विशेष गाड्यांचे आरक्षणे खुले होताच काही मिनिटांत फुल्ल झाल्यानंतर आता या गाड्यांचा गणपतीसाठी कोकणात गावी येणाऱ्या चाकरमान्यांना आधार घ्यावा लागणार आहे. रेल्वेने जाहीर केलेल्या गणपती विशेष गाड्यांमध्ये या गाड्यांचा समावेश आहे. आधी कोकण रेल्वेने मध्य रेल्वेच्या सहकार्याने सात विशेष गाड्यांची घोषणा केली होती. कोकण रेल्वेने पश्चिम रेल्वेच्या सहकार्याने विविध सहा मार्गांवर गणपती विशेष गाड्यांची घोषणा केली आहे. ०९००२, ०९०१०, ०९०१६, ०९४११, ०९१४९०, या पाच विशेष गाड्यांचे आरक्षण २८ जुलै रोजी सुरू होणार आहे.
या आहेत विशेष गाड्या
– मुंबई सेंट्रल ते ठोकूर साप्ताहिक विशेष (गाडी क्रमांक ०९००१/०९००२)
– मुंबई सेंट्रल ते सावंतवाडी रोड आठवड्याचे सहा दिवस (गाडी क्र. ०९००९/०९०१०)
– वांद्रे ते कुडाळ साप्ताहिक विशेष (गाडी क्रमांक ०९०१५/०९०१६)
– अहमदाबाद ते कुडाळ साप्ताहिक विशेष (गाडी क्रमांक ०९४१२/०९४११)
– विश्वामित्री ते कुडाळ साप्ताहिक स्पेशल फेअर ट्रेन (ट्रेन क्र. ०९१५०/०९१४९)
– अहमदाबाद ते मंगळुरु साप्ताहिक स्पेशल फेअर ट्रेन (ट्रेन क्र. ०९४२४/०९४२३)
