मुंबई : महाराष्ट्र गृहनिर्माण व क्षेत्रविकास प्राधिकरणाच्या (म्हाडा) अधिकृत संकेतस्थळाशी https://mhada.gov.in नामसाधर्म्य असणारे बनावट अनधिकृत संकेतस्थळ तयार करण्यात आले असून, या माध्यमातून काही नागरिकांची फसवणूक झाल्याचे निदर्शनास आले आहे. याबाबत म्हाडा प्रशासनाने तात्काळ पाऊल उचलत सायबर सेलमध्ये तक्रार दाखल केली आहे. म्हाडाचे उपाध्यक्ष तथा मुख्य कार्यकारी अधिकारी संजीव जयस्वाल यांनी म्हाडाच्या घरांच्या सोडतीसाठी अर्जदारांना सावधानतेचा इशारा दिला आहे. ते म्हणाले की, अर्जदारांनी केवळ म्हाडाच्या अधिकृत संकेतस्थळावरूनच अर्ज नोंदणी करावी आणि कोणत्याही प्रकारच्या अनधिकृत संकेतस्थळांना बळी पडू नये. “म्हाडाच्या गृहप्रकल्पातील २०३० सदनिकांची नुकतीच सोडत जाहीर करण्यात आली असून, अर्ज प्रक्रियेत सहभागी होण्यासाठी https://housing.mhada.gov.in या अधिकृत संकेतस्थळाचा वापर करावा. याशिवाय कोणत्याही दुसऱ्या संकेतस्थळावरून अर्ज न करता, फसवणुकीपासून सावध राहावे,” असे जयस्वाल यांनी सांगितले.
फसवणूक झालेल्या नागरिकांकडून मिळालेल्या माहितीनुसार, काही अज्ञात व्यक्तींनी ‘mhada.org’ नावाने बनावट संकेतस्थळ तयार केले असून, यावर थेट पेमेंटचा पर्याय उपलब्ध करून देण्यात आला आहे. बनावट संकेतस्थळाचे होम पेज, पत्ता व पहिल्या पानावरील संकेतस्थळाची रचना म्हाडाच्या अधिकृत संकेतस्थळासारखीच आहे. काहींनी या बनावट संकेतस्थळावरून रक्कम भरून पावतीही प्राप्त केली आहे, असे म्हाडा प्रशासनाने स्पष्ट केले आहे.
म्हाडा प्रशासनाने नागरिकांना आवाहन केले आहे की, म्हाडा सोडतीसाठी अर्ज करण्याकरिता https://housing.mhada.gov.in हे अधिकृत संकेतस्थळ असून या व्यतिरिक्त कुठल्याही अनधिकृत संकेतस्थळावर अर्जदारांनी सोडतीत सहभाग घेऊ नये, कोणतीही वैयक्तिक माहिती देऊ नये तसेच कोणतेही आर्थिक व्यवहार करू नये. अर्जदारांनी कोणत्याही अनधिकृत व्यक्तीशी परस्पर आर्थिक व्यवहार करू नये आणि तसे केल्यास मंडळ अथवा म्हाडा प्रशासन जबाबदार राहणार नाही. नागरिकांना असेही आवाहन करण्यात येत आहे की, त्यांची अशाप्रकारे कोणी व्यक्ति/ दलाल काही प्रलोभने देऊन फसवणूक करीत असल्याचे आढळल्यास त्यांनी ‘म्हाडा’च्या मुख्य दक्षता व सुरक्षा अधिकारी तसेच उपमुख्य अधिकारी (पणन) मुंबई मंडळ यांचे कार्यालयास कळवावे.
