बोर्ड परीक्षा कॉपीमुक्त करण्यासाठी केंद्राच्या परिसरातील झेराॅक्स सेंटरला लागणार कुलूप

पुणे : इयत्ता दहावी आणि बारावी बोर्ड परीक्षा कॉपीमुक्त, भयमुक्त व निकोप वातावरणामध्ये सुरळीत पार पडाव्यात यासाठी महाराष्ट्र शासन व  महाराष्ट्र राज्य माध्यमिक व उच्च माध्यमिक  शिक्षण मंडळ प्रयत्नशील आहे. त्या पार्श्वभूमी शिक्षण विभागाने आणखीन एक महत्त्वाचा निर्णय घेतला आहे. ज्या दिवशी दहावी, बारावीची परीक्षा असेल त्या दिवशी परीक्षा केंद्राच्या परिसरातील ५०० मीटर अंतराच्या आतमध्ये येणारे सर्व झेराॅक्स सेंटर बंद ठेवण्याचा निर्णय मुख्य सचिव यांच्या अध्यक्षतेखाली झालेल्या बैठकीत घेण्यात आला आहे. राज्यातील संवेदनशील परीक्षा केंद्र परिसरामध्ये जिल्हा प्रशासनामार्फत ड्रोन कॅमेराव्दारे परीक्षा केंद्राची निगराणी करण्यात येणार आहे.  परीक्षा सुरू होण्याअगोदर एक दिवस आधी परीक्षा केंद्रावर आवश्यक भौतिक सुविधा सुव्यवस्थित आहेत का? याची जिल्हा प्रशासनाकडून खात्री केली जाणार आहे. परीक्षा केंद्राच्या बाहेर जिल्हा प्रशासनामार्फत व्हिडीओ चित्रीकरण करण्यात येण्यात आहे.

जिल्हयातील सर्व विभागाचे शासकीय अधिकारी व कर्मचाऱ्यांच्या सहाय्याने कॉपीमुक्त परीक्षा होण्यासाठी सर्व परीक्षा केंद्रांवर भरारी पथके व बैठी पथके उपलब्ध होतील याचे नियोजन करण्यात येणार आहे. जिल्हा प्रशासनाकडून परीक्षा केंद्रावर नियुक्त केलेल्या केंद्रसंचालक, पर्यवेक्षक व परीक्षेशी संबंधित घटकांची Facial Recognition System व्दारे तपासणी करण्यात येणार आहे. तसेच विभागीय मंडळामार्फत परीक्षेशी संबंधित सर्व घटकांना अधिकृत ओळखपत्र देण्यात येणार. महाराष्ट्र गैरव्यवहार प्रतिबंधक कायदा १९८२ या कायद्याची अंमलबजावणी करावी व कोणत्याही परीक्षा केंद्रावर गैरप्रकार घडल्यास गैरप्रकारांना मदत करणारे व प्रत्यक्ष गैरमार्ग करणाऱ्यांवर दखलपात्र व अजामीनपात्र गुन्हा दाखल करण्यात येईल. परीक्षा केंद्रापासून ५०० मीटर परिसरात झेरॉक्स सेंटर परीक्षा कालावधीत बंद ठेवण्यात येणार आहेत तसेच संबंधित परीक्षा केंद्राच्या परिसरात १४४ कलम लागू करण्यात येईल. यावर्षी होणाऱ्या इ. १२ वी व इ. १० वी परीक्षांच्या धर्तीवर कॉपी प्रकरणास पूर्णतः प्रतिबंध करण्यासाठी राज्यभर कॉपीमुक्त अभियान यशस्वी करण्याचे आवाहन विद्यार्थी, पालक, शिक्षक व परीक्षेशी संबंधित सर्व घटक यांना करण्यात आले आहे.